Japan Content Showcase 2014: Pagpapalitan ng produkto, kultura at impluwensiya

***originally published in the November Issue of Pinoy Gazette

Also published on Pinoy Gazette`s official blog: pinoygazetteofficial.blogspot.jp

Kuha mula sa Official Facebook Page ng Japan Content Showcase 2014

Napansin niyo ba kung bakit mas maraming mga dramang mula Korea ang naipapalabas sa Pilipinas kaysa sa mga dramang Hapon? Nakakatawa naman ang mga dramang Hapon, mas maiikli kaya mas madaling subaybayan at hindi naman kumplikado ang mga kwento, pero bakit hindi ito karaniwang binibili ng mga local networks samantalang ang mga anime naman ay namamayagpag sa local channels?

Siyempre, isa sa pinakamahalagang bahagi ay ang negosasyon sa pagitan ng mga kumpanya: gaano katagal ipapalabas ang isang drama sa Pilipinas, ano ang mga restrictions na nakakabit sa pagbili ng rights nito, magkano ang presyo nito at mababawi ba ang halagang ito kapag ipinalabas  na ito sa local channel?

Isa ang Japan Content Showcase sa mga venue kung saan nagaganap ang mga ganitong usapan.

           

Ang Japan Content Showcase 2014 ay ginanap sa Hotel Grand Pacific Le Daiba kamakailan. Ginaganap ito taun-taon upang tipunin ang mga content holders at buyers mula sa iba’t ibang industriya tulad ng pelikula, musika,t elebisyon, animation at iba pa. Dito ay nagkakarooon ang mga content holders/exhibitors ng pagkakataon na ibenta ang kanilang mga produkto sa mga potensiyal na mamimili na mula pa sa iba’t ibang bahagi ng mundo.

Ang Mga Nakibahagi

Ang taong ito ang nagtala ng pinakamaraming exhibitors at buyers na dumayo pa ng Japan para lang maging bahagi ng malaking pagtitipong ito. Record-breaking na maituturing ang bilang ng  mga sumuporta, dumalo, nag-volunteer at naging bahagi ng event na ito sa iba’t ibang paraan. Sa loob ng tatlong araw, nakibahagi ang 331 exhibitors mula sa 25 bansa; 1,158 buyers mula sa 39 bansa; at 18,000 katao. Marami sa mga exhibitors ay mula Korea, Taiwan at Cambodia. Ito rin ang kauna-uanahang pagkakataon na may lumahok mula sa Colombia, Cote d’Ivoire at Estonia.

Mapapansin din ang unti-unting pagbubukas at paglawak ng merkado ng mga bansa mula sa Southeast Asia tulad ng Cambodia, Thailand, Malaysia, Indonesia, Vietnam at Singapore na hindi lamang bumibili ng content mula sa Japan ngunit nag-e-export na rin ng sarili nilang gawa. Sa taong ito, tumaas ng 19% ang mga exhibitors mula sa Southeast Asia. Wala mang malaking exhibitor na mula Pilipinas, mayroon namang mga dumalong mga indibidwal na Pilipino na ipinadala ng kanilang mga kumpanya at organisasyong kinabibilangan.

Mga Itinampok na Seminar

Hindi lamang puro negosasyon sa bilihan ng content ang nagaganap sa Japan Content Showcase, mayroon ding mga seminar na kapupulutan ng mga impormasyon tungkol sa iba’t ibang industriya sa Asya. Ilan sa mga interesanteng seminar ay tumalakay sa mga sumusunod na paksa:

·         Sa seminar na pinamagatang “Introducing Japanese Music Overseas: Issues and Potentials,” pinag-usapan ang ilan sa mga matagumpay na karanasan ng mga organizers sa pagma-market ng mga Japanese artists tulad ng Xjapan, One OK Rock, Morning Musume at Hatsune Miku sa Amerika at Europa.

·         Sa “Initiatives for the Development of Content Industry in Each Country and the Asian Region: Possible Cooperation in the Asian Region,” tinalakay ang malaking potensyal ng co-production para sa mga nais gumawa ng pelikula o animation sa tulong ng mga agencies o production houses sa ibang bansa. Binanggit din ang posibilidad na makakuha ng mga subsidy sa mga ahensyang pang-gobyerno kung makikipag-ugnayan sa kanila tungkol sa mga proyektong nais gawin sa bansang iyon. Ang mga panelista ay nagmula sa Thailand, Singapore, China, Japan at South Korea.

·         Sa “Southeast Asian Visual Contents: The Present and Future in Film-TV Market” ipinaliwanag kung anong mga pelikula at TV show ang popular sa Southeast Asia at kung saan posibleng tutungo ang mga trend na ito sa mga susunod na taon.

·         Para naman sa mga gustong makipagtulungan sa mga Japanese TV companies, ipinaliwanag sa “How to Find a Partner – Essential Tips on Collaborating with the Japanese TV Industry” ang kasalukuyang kalagayan ng industriyang ito. Nagbigay rin ang mga panelista ng mga suhestiyon kung paano makakapagbukas ng pagkakataon para makipagtrabaho sa mga ito. Nagbahagi rin sila ng mga karanasan nila sa pakikipagtrabaho sa mga production houses mula sa ibang bansa.

Iba pang Kaganapan

Kasabay ng Japan Content Showcase 2014 ay ang Tokyo International Music Market kung saan nagpakitang-gilas ang ilan sa mga bagong Japanese artists sa kanilang mga live performances, at ang Tokyo International Film Festival na siyang nagtampok sa mga pelikula mula sa iba’t ibang panig ng mundo kabilang na ang tatlong entries mula sa Pilipinas.

Kasabay nang mabilis na pagbabago sa kalidad at nilalaman ng mga pelikula, TV show at musika mula sa Japan at sa iba pang bansa na pumapasok sa Pilipinas, mabilis din na nagbabago ang impluwensiya ng bawat bansang nagbebenta at bumibili ng kanilang mga content mula sa isa’t isa. Naging saksi ang Japan Content Showcase 2014 sa lumalaking bahagi ng Southeast Asian market sa malayang pagpapalitan ng produkto at kultura sa bahaging ito ng Asya at siguradong patuloy pa itong magiging saksi sa mga susunod pang taon.