"Glamping" Sites in Tokyo

Karaniwan nang ginagawa tuwing summer ang pagha-hiking, pagba-barbecue sa mga parks at pagsu-surf. Ang pagka-camping ay isa ring maaaring alternatibo para sa mga taong nais magrelax kasama ang kalikasanan. Pero para sa mga taong hindi pa handang iwanan ang alwan ng buhay sa siyudad, mas nababagay gawin ang “glamping” o “glamorous camping.” Hindi ito nalalayo sa konsepto ng pagka-camping, yun nga lang, mas pinadali nito ang outdoor activities dahil lahat ng mga bagay na kakailanganin ay handa na sa campgrounds at maaari na lamang rentahan tulad ng mga cabins na tulugan, at mga BBQ spots at cooking facilities, mayroon ding mga convenient stores at restaurants!

Mayroong halos 3,000 campsites sa buong Japan kung saan maaaring magtayo ng mga tent at magpalipas ng gabi. Marami sa mga ito ang mayroon ding mga bungalows at cabins na maaaring rentahan kung ayaw magpalipas ng gabi sa tent. Marami sa mga ito ay hindi madaling puntahan dahil hindi ito dinadaanan ng mga pampublikong transportasyon. Mas mainam kung magdadala ng sariling sasakyan. Ang sumusunod ay ilan sa mga “glamping” sites na hindi nalalayo sa Tokyo:

Jonanjima Seaside Park, Tokyo. Kung ayaw mong lumayo masyado sa Tokyo, ang Jonanjima Seaside Park ang pinakamalapit na campgrounds na maaari mong puntahan. Mayroon itong artificial beach, mga BBQ spots at skateboard area. Nagkakahalaga ng Y3000 ang daytrip at Y600 naman para sa unang gabi at Y300 sa mga susunod. Maganda rin itong lugar para sa mga mahilig magplane watching dahil makikita mula dito ang mga eroplanong lumilipad at bumababa sa di-kalayuang Haneda Airport. Dito rin dumadaan ang mga magagarbong cruise ships papuntang Tokyo Bay.

Nagatoro Autocamp-jo, Saitama. Mainam ang campsite na ito para sa mga first time campers.dahil mayroon nang mga equipment for rent sa campgrounds na ito. Mayroon silang mga bungalow kung ayaw mo magtent. May iba’t-ibang laki ang bungalow na maaaring maglaman ng 2 hanggang 40 katao. Mayroon ding maliit na kombini, mga vending machines at mga utensils na maaaring hiramin. Mayroon ding mga BBQ spots sa paligid ng campgrounds. Matatagpuan ang campgrounds sa tabi ng ilog kung saan maaaring mag-indulge sa mga water sports tulad ng kayaking at canoeing; maaari ring magfishing, at magbiking. Nagkakahalaga ng Y3,000 bawat sasakyan (hanggang 5 tao) plus Y500 para sa facility fee. Y1000 naman bawat tao kung hindi lalagpas sa 5 ang grupo. 

Ashinoko Camping Village, Kanagawa. Hindi lamang kumbinyenteng puntahan ang campgrounds na ito dahil maaari lang itong lakarin mula Togendai Station, nasa tabi rin ito ng Lake Ashinoko na bahagi ng Fuji-Hakone National Park. Mayroon silang mga 2-bedroom cabins, kitchen areas at terrace para sa pagba-BBQ. Tahimik din ang lugar na ito at mainam para sa mga gustong magrelax at magmuni-muni. mayroon din itong public bath na nagkakahalaga lang ng Y350. Kung nais magside trip, maaaari kayong sumakay ng Hakone Ropeway paakyat ng Owakudani, isang volcanic valley na kilala sa mga black eggs - mga itolg na iniluto sa pamamagitan ng init na nanggagaling sa bulkan. 

Japonica Lodge, Tokyo. Kung wala kang oras na lumayo sa Tokyo at gusto mo lang maexperience ang “tent life,” maaari kang magbook ng stay sa Japonica Lodge, isang guest house sa gitna ng Tokyo. Sa halagang Y2,500 ay maaari ka nang matulog sa loob ng tent! Sa halip na bunk beds, hinanay ng maayos ang mga tent sa loob ng kwarto ng guest house. Walang mga lamok at maiingay na insekto, may shared shower at toilet, wifi at lockers pa! Kung magustuhan mo ang mga tent ay maaari mong bilhin at iuwi ang mga ito. Gawa ng Japanese manufacturers ang mga tent na ito kaya siguradong matibay ang mga ito. 

Kung gusto mong panandaliang tumakas sa bilis ng takbo ng buhay sa Tokyo at magnature tripping, di na kailangang lumayo pa. Hindi na rin kailangang mag-alala, dahil “glamping” na ang uso.

*** Published in the August 2016 issue of the Pinoy Gazette

Parasailing Away!

***originally published in the June Issue of Pinoy Gazette

Also published on Pinoy Gazette`s official blog: pinoygazetteofficial.blogspot.jp

Ilan sa mga pinakapatok na beach activities tuwing summer ay ang surfing, snorkeling, scuba diving, helmet diving at kamakailan, unti-unti na rin nagiging popular ang cliff diving. Pero hindi lang mga water sports ang pwedeng pagkaabalahan tuwing summer. Para sa mga naghahanap ng bagong experience, magandang subukan ang parasailing.

Parasailing vs. Paragliding

           

Ang parasailing ay kilala rin sa tawag na “parakiting.” Nakasabit ang parasailers sa isang malaking parachute gamit ang harness. Ang parachute na ito ay especially designed para sa activity na ito at naiiba sa mga karaniwang ginagamit sa skydiving.

Naiiba rin ito sa paragliding dahil ang parasail ay hinihila ng isang sasakyan. May dalawang uri ng parasailing – aquatic at terrestrial. Sa aquatic, hinihila ang parasail ng isang speedboat o yate, habang sa terrestrial naman ay hinihila ito ng isang 4x4 jeep. Walang control ang parasailers sa kanilang parasail dahil ang may control sa pagtaas at pagbaba nito ay ang mga tao na nasa sasakyang humihila nito. Samantalang sa paragliding naman, may kakayahan ang paraglider na ikontrol ang taas, bilis at direksyon ng paraglide. Karaniwang pinalilipad ang parasail sa taas na 400ft-1200ft, samantalang umaabot naman sa 15,000ft ang paraglide.

Sa pagtake-off ng parasail, kailangan walang ibang bagay na nakasasagabal sa paglipad nito. Karaniwan itong ginagawa sa isang open space o sa gitna ng laot kung saan hindi masyadong malakas ang alon. Hindi nagiging stable ang pag-angat ng parasail kung nauuga ang bangka ng malakas ng alon. Samantalang, sa paragliding naman, kailangan itong gawin sa isang mataas na lugar tulad ng bundok kung saan may tamang lakas ng hangin.

Parasailing sa Boracay

Ang isa sa mga pinakakilalang lugar sa Pilipinas kung saan maaaring magparasailing ay walang iba kung hindi sa Boracay. Nagkakahalaga ng P1,500 bawat tao ang parasailing. Maaari itong gawin ng dalawa o tatlong tao ng magkakasabay. Sa una ay isasakay ang parasailers sa isang speedboat na magdadala sa kanila sa laot. Sa laot ay ililipat sila sa isa pang maliit na yate kung saan isusuot ang life vests, helmets at iba pang safety gear. Dito rin ikakabit ang kanilang mga harness sa parasail. At dito dahan-dahang paaangatin ang parasail hanggang sa maabot na nito ang gustong taas.  

Tips sa mga Mga Nais Sumubok mag Parasail

Sadyang nakakakaba talaga sa una ang pagpaparasail lalo na yung panahon kung kalian dahan-dahan itong itinataas sa ere. Pero hindi naman mabilis ang pagtataas na ito, mabagal at maingat itong ginagawa kaya ligtas naman. Ang sumusunod ay ilang tips para sa mga nais sumubok ng parasail:

• l  Huwag titingin sa ibaba. Tumingin sa malayo at i-appreciate ang laot, ang mga isla, ang papalubog na araw, pero ‘wag na ‘wag titingin sa ibaba dahil siguradong magbibigay kaba at lula lamang ito.
• Kumapit sa harness at mag-relax. Sa una lang naman nakakatakot ang pagpaparasail, pero kung nasa itaas ka na ay nakakarelax na ito. Presko ang simoy ng hangin at tahimik. Marami kang mga makikita at madidiskubreng mga bagay mula sa pagtanaw mula sa ibabaw ng dagat. May makikita kang mga lumulundag na mga isda, may mga taong kumakaway mula sa mga dumadaang pampasaherong barko, may magagandang isla sa malayo at marami pang iba.  
• Magsama ng pamilya o malapit na kaibigan. Mas masaya kung may kasama kang kabahan, matakot, tumawa at tumingin sa ganda ng paligid. Mas nagiging maganda ang mga tanawin kung nakikita mo ito kasama ang mga taong mahalaga sa’yo.  

Parasailing sa Japan

Hindi lamang sa Pilipinas maaaring masubukan ang parasailing. Marami rin mga lugar sa Japan kung saan maaaring subukan ang parasailing, Okinawa ang pinakapopular dito. Tulad ng sa Pilipinas, maganda rin ang dagat sa Okinawa – malinaw ang tubig at maraming mga magagandang magkakalapit na isla. Pwede rin subukan sa Kanagawa, Chiba at Saitama ang parasailing. Mayroong mga package online na maaaring ipa-book ilang linggo bago ang planong pagpaparasail para hindi maubusan ng slots lalo na kung peak season.

Kaya ngayong summer, para maiba naman, isang magandang experience ang subukan ang parasailing. Hindi lamang ito isang bagong paraan ng pagtanaw sa paligid, kung hindi isang bagong paraan sa pagsalubong ng tag-init!